Published: Monday, June 1, 2020 11:52
Директорката за Упрвата за јавни приходи (УЈП), Сања Лукаревска, како што самата објави на Фејсбук претпладнево, е позитивна на ковид-19. Лукаревска напиша дека по работните средби што ги имале со Мухамед Зекири, потпретседател на СДСМ кој е позитивен на коронавирусот, и таа се тестирала и оти резултатот е позитивен.
„После веста што ја објави другарот Мухамед Зекири, а поради работните состаноци кои ги имавме заедно, направив тест за ковид-19 и резултатот е позитивен. Немам никакви симптоми и веќе сум во домашна самоизолација. Не можам да бидам сигурна на каков начин сум го добила вирусот, но сите контакти кои ги имав последниве денови беа со целосно почитување на мерките за заштита, со маска, на дистанца и со редовна дезинфекција. Ќе ги следам насоките на епидемилозите во целост и очекувам повеќе информации од нивна страна, согласно анкетата која треба да ми биде направена. Посакувам брзо оздравување на Муки и семејството, на сите други заболени граѓани, како и негативни тестови на сите кои се во самоизолација“, напиша Лукаревска на Фејсбук.
Поради работните состаноци со Зекири, во самоизолација од денеска се и вицепремиерката за економски прашања, Мила Царовска, министерот за информатичко општество и администрација, Дамјан Манчевски и советникот за односи со јавност на претседателот на Владата, Марјан Забрчанец, првиот човек на Финансиската полиција, Муарем Арафат и градоначалникот на Чаир, Висар Ганиу.