Водечката експертка на Светската здравствена организација (СЗО) денеска ги расчисти „недоразбирањата“ по вчерашната изјава која беше сфатена како сугестија дека асимптоматските случаи ретко го пренесуваат коронавирусот, пишува „Дојче Веле“. Марија ван Керхове, која ја предводи техничката асистенција во справувањето со пандемијата, денеска појасни дека нејзината изјава се однесувала само на неколку студии, а не на целосната слика за коронавирусот.
Неколку експерти реагираа на вчерашната изјава на Ван Керхове со оценка дека таквиот став би можел да им отвори проблем на владите кои се обидуваат да ги намалат ограничувањата.
„Бев изненаден од ставот на СЗО. Тоа е спротивно на мојот впечаток од науката досега кој сугерира дека асимптоматските случаи, како и пред-симптоматските лица се важен извор на инфекцијата за другите“, вели Лијам Смет, професор по клиничка епидемиологија во Лондон.
Освен што денеска СЗО ја коригираше изјавата за асимптоматските случаи, дополнително информира и за новите студии кои покажуваат дека заразените луѓе се најзаразни во моментот кога за првпат ќе се почувствуваат болни.
„Од ограничените информации кои ги поседуваме, се чини дека луѓето имаат повеќе вирус во нивните тела во или околу периодот кога ги развиваат симптомите, односно многу рано“, вели Ван Керхове.
Првичните студии во Германија и во САД сугерираат дека луѓето со лесни симптоми можат да бидат заразни од 8-9 дена, додека кај оние кои се потешко болни вирулентноста трае „далеку подолго“.
