Обвинителството за организиран криминал и корупција соопшти дека е поднесе обвинение против актерката Силвија Стојановска и против уште едно лице за неовластено производство и пуштање во промет на наркотични дроги, психотропни супстанци и прекурсори, кривично дело по член 215 став 3 во врска со став 1 од Кривичниот законик.
„По спроведената меѓународна операција „Колибри“ во која беа лишени од слобода пет лица од кои две на територијата на нашата држава и три лица на територија на Кралството Шпанија, надлежниот јавен обвинител спроведе сеопфатна истражна постапка. Во текот на истрагата, Обвинителството утврди дека во периодот од јули 2019 година до 18.12.2019 година, обвинетите, заедно со тројцата обвинети во Кралство Шпанија, од кои едниот е македонски државјанин, брат на првообвинетиот, учествувале во неовластено купување, пренесување и продавање на наркотична дрога – кокаин во вкупна количина од 698.758,1 грам“, се вели во дописот на Обвинителството.
Обвинетите, се додава во соопштението, подготовувале и организирале неовластено купување, превезување и сместување на наркотична дрога – кокаин од Колумбија до Мадрид и барале купувачи за истата.
„За да не бидат откриени во нивните постојани активности, обвинетите меѓусебно комуницирале со користење на енкрочат телефонски мобилни уреди, како и енкрочат мобилни апликации со заштитени канали, а користеле и уред за детектирање на евентуална полициска инсталација и на дигитални преноси за примена на посебни истражни мерки – инхибитор (PROTECT 1207i)“, информираат од Обвинителството.
Обвинителството заедно со Обвинителниот акт му предложи на судот да ја продолжи мерката притвор за првообвинетиот и мерката куќен притвор за второобвинетата.