Амбулантскиот дел, Ургентниот центар и чекалната во Универзитетската клиника за детски болести во изминатиот период беа комплетно се реновирани со цел унапредување на условите за третман на пациентите, како и условите за работа на персоналот, соопшти Министерството за здравство.
„Амбуланскиот дел е целосно обновен со нова опрема. Извршени се бројни градежни зафати, поставени се нови прозорци, нова електрика, а во дел од просториите е променет таванот и подот. Комплетно се обновени тоалетите за пациентите и за персоналот, а набавен е нов мебел наменет за овие оддели. Со цел непречено функционирање на клиниката во услови на пандемија од коронавирусот, се применуваат посебни мерки за заштита и во таа насока се поставени нови шалтери за прием на пациенти, како и нови столчиња во чекалната на пациентите. Исто така, комплетно се реновирани и опремени клиничката аптека, помошните простории и пералната“, посочуваат од Министерството.
Во однос на актуелната состојба со коронавирусот, од Клиниката со апел до родителите кои имаат потреба да ги донесат своите деца на преглед, да ги почитуваат мерките за заштита препорачани од Министерството за здравство – носење задолжителна заштита на лицето на родителот и на детето, одржување најмалку два метра физичка дистанца и честа хигиена на раце.