Македонија и официјално го доби десеттиот парламентарен состав. Верификациската комисија на денешната конститутивна седница ги верификува мандатите на 120. пратеници кои до место во законодавниот дом стигнаа на предвремените парламентарни избори на 15 јули.
Јагода Шахпаска, претседателката на Верификациската комисија, ја нагласи констатацијата оти нема основ за оспорување на изборoт на ниту еден пратеник. На седницата на Комисијата беше разгледан и извештајот на Државната изборна комисија (ДИК) за изборите врз основа на кој и беше донесен предлог.
Конститутивната седница на новиот парламентарен состав се одржра во салата „Голема купола“ согласно здравствените протоколи за заштита од ширење на Ковид-19. На оваа седница од 120-те пратеници не присуствуваа само тројца.
Две од четирите точки на усвоениот дневен ред на свечената седница, меѓу која и за избор на претседател на Собранието, е оставена за, како што најави собранискиот спикер во заминување, Талат Џафери, кога ќе се создадат услови.
Функцијата претседател на Собранието и припаѓа на партијата/коалицијата со обезбедено мнозинство за формирање на влада, процес кој формално почнува денеска. Собраниските седници дотогаш ќе ги води Џафери, а во негово отсуство пратениците Горан Мисовски и Флоријан Бесими.
„На претседателот на Владата и на членови на Владата на кои денеска им беше верификуван мандатот за пратеници, согласно член 8 став 1 од изборниот законик, им преставуваат функциите во Владата. Заради обезбедување на континуитет во работата на Владата на РСМ, според член 93 став 5 од уставот, Владата останува на должност до изборот на нова Влада“, рече досегашниот претседател на Собранието, Талат Џафери.
Претседателот на државата, според Устав, во рок од десет дена по конституирање на Собранието го доверува мандатот за состав на Владата на кандидат на партија, односно партиите што имаат мнозинство во Парламентот. Мандатарот, пак, во рок од 20 дена од денот на доверувањето на мандатот, поднесува програма до Собранието и го предлага составот на Владата која се бира со мнозинство гласови од вкупниот број пратеници.
Претседателот Стево Пендаровски веќе најави дека планира да одржи консултации со политичките партии по конституирање на Парламентот, по што, согласно уставните одредби, ќе го додели мандатот за формирање нова влада на партијата, односно на партиите што ќе обезбедат мнозинство во Собранието на Република Северна Македонија.
На изборите на 15 јули, коалицијата „Можеме“ предводена од СДСМ освои 46 пратеници, коалицијата „За обнова на Македонија“ на ВМРО-ДПМНЕ – 44, ДУИ – 15, коалицијата на Алијанса на Албанците и Алтернатива – 12, Левица – два и ДПА – еден мандат.