Државната комисија за спречување корупција (ДКСК) отвори предмет за министерката за финансии Нина Ангеловска со цел да испита дали има судир на интереси во врска со нејзиното постапување со средствата што ги имала во „Еуростандард банка“ пред да биде ставена во стечај. Од ДКСК за МИА потврдија дека предметот е отворен по нивна иницијатива со цел да се расчисти целиот случај што предизвика реакции во јавноста.
ДКСК е во фаза на собирање податоци за предметот од Народна банка и од Министерството за финансии со цел да се утврди дали министерката имала информации дека банката ќе биде затворена, па затоа ги повлекла нејзините финансиски средтва или пак сосема нормално си располагала со нив, што е право на секој што има средства на некоја банка.
Од ДКСК за МИА велат дека тука не станува збор за кривично дело, туку за неетичко постапување доколку министерката имала информации за пропаѓањето на банката, што секако треба допрва да се утврдува.
Проблем би било, појаснуваат од ДКСК, доколку министерката имала таква информација и таа натаму ја ширела до други лица за да ги повлечат парите.