Нови 11.700 дози од вакцината на производителот „Фајзер” попладнево стигнаа во Македонија, објави на Фејсбук министерот за здравство, Венко Филипче. Од нив, 7020 се преку директни преговори со производителот, а 4680 дози се од ЕУ што ги обезбедува како помош преку трилатерални договори во рамките на програмата „Тим Европа“. Оваа програма за поддршка во снабдувањето вакцини за Западен Балкан ја координира Австрија.
Утрово министерот соопшти дека на вакциналните пунктови останати се само 5000 вакцини за вакцинирање со прва доза, додека во сите пунктови тековно се врши и ревакцина согласно добиените термини за ревакцинација.
Во текот на оваа недела, најавено е дека ќе пристигнат околу 70 000 вакцини од Бугарија и Грција, од Астра Зенека. За сега нема информација кога ќе стигне поголемата пратка од кинескиот производител „Синовак“.
Досега во земјава вакцинирани се 235.000 граѓани, а на сајтот vakcinacija.mk пријавени се над 430.000 граѓани.
Најголем процент на имунизирани има кај повозрасните граѓани, дури47 % од населението над 70 години и 41 % над 65 години примиле барем една доза од анти ковид вакцината.