За првпат после 70 години се реализираше комплетна обнова на внатрешните простории во ЗД д-р Хаим Абраванел во Битола. Овој проект опфаќа комплетна обнова на внатрешните простории, ходниците, работните простории, педијатриската служба, вакциналните пунктови, превентивната служба, превентивната стоматологија и делот кадешто се чуваат вакцините од редовниот календар.
По овој повод денеска министерот за здравство д-р Венко Филипче го посети Здравствениот дом во Битола каде оствари средба со директорката д-р Весна Спиркоска и целокупниот медицински персонал и градоначалничката на Општина Битола Наташа Петровска. Во изјавата за медиуми тој најави и дополнително унапредување на услугите кои овој Здравствен дом им ги нуди на граѓаните. Наскоро преку таа донација за Здравствениот дом во Битола ќе стигне ново амбулантно возило.
„Во овој Здравствен дом не е направена никаква инвестиција од 50тите години. Оваа установа опфаќа голем број на граѓани – пациенти на кои им пружа здравствена услуга. Целокупниот процес на реновирање ќе се финализира со замена на кровот во периодот којшто следува и помошта која се очекува да пристигне од делегацијата на ЕУ со што ќе се обезбеди ново амбулантно возило за потребите на жителите во Битолскиот регион. Честитки до директорката и целокупниот здравствен персонал кои покажаа дека може да се справат со менаџирањето на ковид кризата, но и целокупниот процес на вакцинирање во салата за масовна имунизација во Битола“, изјави министерот Филипче.
Во период од 2019 и 2020 година беше реновиран целокупниот Здравствен дом со ходниците, влезот и скалите. Во целост беше реновирана детската превентивна стоматологија и служба за здравствена заштита од 7 до 18 години. Службата за здравствена заштита на деца од 0 до 7 години, а беше набавена и нова опрема од три хематолошки бројачи, стрес тест трака, подоскоп, хелио ламби за стоматологија и два фрижидери за вакцини.
Пред две години, целосно беше реновирана службата на Итната медицинска помош, а финализирање на целокупниот процес на обнова ќе се заокружи со замена на кровот на установата.
Во продолжение фотографии од реновираниот објект:
