Членовите на чилеанското Уставно собрание избраа претседателка на државата, која е припадник на домородното племе Мапуче и ќе ја извршува функцијата до усвојувањето на нов устав, пренесуваат светските агенции.
Станува збор за Елиса Лонкон која освои апсолутно мнозинство во вториот круг од гласањето, односно со 96 од вкупно 155 гласови во Уставното собрание во Сантјаго. Задача на Уставното собрание е да изготви нов устав за земјата, за кој Чилеанците ќе гласаат на референдум.
„Сакам да им се заблагодарам на сите што гласаа за жена Мапуче, што ќе ја промени историјата на оваа земја“, изјави Лонкон во својот прв говор по изборот. Таа зборуваше и на јазикот мапудунгун што го користи Мапуче племето, како и на шпански.
„Ова собрание ќе го претвори Чиле во мултинационално Чиле, интеркултурно Чиле“, порача Лонкон.
Собранието е обврзано да презентира нов устав во рок од една година. Во октомври, Чилеанците со огромно мнозинство гласови на референдум гласаа за нов текст на уставот, бидејќи актуелниот датира од 1980 година, од воената диктатура на генералот Августо Пиноче, кој владееше со земјата од 1973 до 1990 година.
Критичарите обвинуваат дека актуелниот Устав ги попречува големите промени во законодавството и не гарантира скоро никакви основни социјални права. Изработка на нов устав беше едно од главните барања на илјадниците демонстранти кои излегоа на улиците против Владата кон крајот на 2019 година.
Инаку, племето Мапуче од јужниот дел на Чиле и Аргентина има долга историја и датира од 600-500 години пред нашата ера. Заедницата Мапуче претрпе големи промени по „средбата“ со Шпанците кон средината на 16 век. Сепак, Мапуче заедницата никогаш не била потполно потчинета од страна на Шпанската империја. Помеѓу 18 и 19 век тие се селат кон исток во рамнините Пампас и Патагонија. Оваа огромна нова територија им овозможи на Мапуче да контролираат значителен дел од трговијата со сол и говеда во Јужна Америка.
Помеѓу 1861 и 1883 година Република Чиле спроведе серија кампањи со кои се стави крај на независноста на Мапуче, по што илјадници Мапучи починаа од глад, болести и грабежи. Аргентина спроведе слични походи на источната страна на Андите во 1870-тите. Во големи делови на земјите населени од Мапуче, традиционалната економија пропадна принудувајќи илјадници луѓе да бараат егзистенција во големите градови и да живеат во сиромашни услови.
Од крајот на 20 век па наваму, луѓето во Мапуче се повеќе активни околу домородните права.