Поранешниот капитен на Реал Мадрид, Серхио Рамос пристигна во Париз, каде денеска треба да ги изврши медицинските проверки пред официјално да биде објавен неговиот трансфер во ПСЖ.
Весникот „АС“ објави дека 35-годишниот дефанзивец бил придружуван од неговиот брат и неговиот агент Рене Рамос. Уште минатата недела тој постигна согласност со Парижаните, со кои се очекува да потпише договор на 2 години, откако со Кралскиот клуб неговиот договор не беше обновен.
Дефанзивецот беше честа мета на повреди минатата сезона и ги пропушти повеќето натпревари на Реал Мадрид, што веројатно го чинеше место во составот на Шпанија за Евро 2020. Сепак, тој сега е целосно опоравен и не очекува никакви проблеми со медицинските проверки.
Официјалното претставување на Рамос како играч на ПСЖ се очекува да се одржи во среда, најверојатно во „Паркот на принцовите“. Дури е можно тој ден подоцна да тренира со својот нов тим под водство на Маурисио Покетино, откако во понеделникот тимот ги започна подготовките за новата сезона.