Mинистерот за надворешни работи, Бујар Османи оствари повеќе билатерални средби, меѓу кои со заменик помошникот државен секретар и специјален претставник на САД за Балканот, Метју Палмер и со Забине Штер, ополномоштеник за ЕУ политики во МНР на Германија, уште пред самиот почеток на Дубровик Форумот, информираат од МНР. Стратешкото партнерство на земјава во евро-атлантската заедница, клучните реформски процеси како поддршка во таа насока и за следните чекори во однос на европските перспективи на земјата, беа дел од темите на средбите.
На состанокот Палмер, како што информираат од МНР, беа реафирмирани заклучоците од високиот панел во рамките на Преспа форумот за дијалог.
– Засилената обнова на трансатлантските врски, засилениот фокус на САД во однос на земјите од Западен Балкан, но и продлабочувањето на Стратешкото партнерство меѓу Северна Македонија и САД преставуваат заеднички геостратешки интереси кои остануваат важен приоритет во рамките на нашата надворешна политика, рекол Османи на средбата.
САД е важен стратешки партенер и нивната долгорочна визија за стабилен, просперитетен и интегриран регион во евроатлантските рамки е сериозен двигател на реформските процеси во овие земји, вели Османи и дополнува дека визијата станува уште поцврста ако се има во предвид фактот дека истата ја делат и нашите европските сојузници и придонесува кон приближување на земјите од Западен Балкан кон членство во Европската унија.
На средбата Штер, во фокусот на разговорот беше европската перспектива на земјата, но и регионалниот аспект особено Берлинскиот процес, последните заклучоци што се донесоа во рамките на оваа иницијатива и активности што следат за нивно преточување во конкретни проекти.
Министерството за надворешни работи најави дека утре Османи ќе биде говорник на панелот „Меѓународната заедница и земјите од Западен Балкан: како да ставиме крај на карантинот?“, а во агендата на министерот има и повеќе билатерални средби со високи претставници.