Словенија избра нов министер во владата на Јанез Јанша, а на предлог на премиерот, парламентот го потврди Марко Борис Андријаниќ за таа позиција, кој ќе ја предводи новоформираната владина служба за дигитална трансформација.
Андријаниќ, 38-годишен адвокат, со магистратура по јавна политика од Оксфорд, има меѓународно искуство и знаење, работел во „Убер“ и на разни проекти во Белгија, САД, Естонија и други земји.
За предлогот на премиерот, кој сака да ја забрза дигитализацијата во која Словенија заостанува, гласаа 46 пратеници, додека 45 беа против.
– Дигитализацијата ја гледам како тимски спорт, во неа мора да биде вклучена целата политика и целото општество, рече Андријаниќ во презентацијата пред пратениците.
Дигитализацијата е еден од приоритетите во програмата за обновување и издржливост на Словенија, која треба да добие грантови од 1,8 милијарди евра и 705 милиони евра поволни кредити од истоимениот фонд на ЕУ.
Во програмата веќе одобрена од Европската комисија, Словенија ќе намени 42,4 проценти од вкупните средства за „зелената трансформација“, а 21,4 проценти за реализација на дигиталните цели.