Само што се вакцинирав, ни малку не ме болеше раката од вакцината, супер поминав! Не треба да се плашите од вакцина, таа многу ќе ви помогне ако се разболите од ковид-19, ни изјави 16-годишниот Бојан Наумовски денеска пред пунктот во скопската поликлиника Букурешт.
Тој е еден од педесетте адолесценти кои до денеска напладне тука се имунизираа со вакцината Фајзер на првиот ден од вакцинацијата против ковид-19 којашто во целата земја почна и за деца на возраст од 12 до 17 години чии родители или старатели се пријавиле на сајтот vakcinacija.mk.
Бојан носеше маица со порака „Just do it“, па се пошегувавме дали намерно ја облекол за таа порака да стаса и до неговите врсници.
– Да, секако! Немав дилема воопшто дали да се вакцинирам против новиот вирус и добро е што еве и кај нас почнаа да ги заштитуваат и помладите – ни рече Бојан, кој од септември се надева дека „во живо“ ќе следи настава во втора година во СУГС „Раде Јовчевски Корчагин“.
Д-р Сања Цилевска Младеновска вели дека три екипи ги вакцинираат граѓаните.
– Денеска почнавме со имунизација на адолесценти на 16 и 17 годишна возраст и еве досега поминаа меѓу 40 и 50 деца. И тие и нивните родители се интересираа за евентуални несакани реакции од вакцината, а кои симптоми се сметаат за вообичаени. Вакцинирањето и на оваа возрасна група денеска поминува без проблеми, немавме некој да пријави несакано дејство – рече д-р Цилевска Младеновска.
Денеска се пријавени вкупно 200 деца и млади заинтересирани да примат вакцина во оваа поликлиника, а процесот во Скопје се одвива и во поликлиниките „Јане Сандански“ и „Чаир“ и во здравствените домови во земјата. Досега биле пријавени 1.800 деца од целата земја, а пријавувањето продолжува.
Граѓаните кои денеска чекаа за вакцина најмногу се интересираа од кој производител се вакцините. Според планот, тоа се вакцините Синовак, Астра Зенека за постари од 60 години и Фајзер за децата од 12 до 17 години.
И оние деца кои немаат здравствено осигурување или не одбрале матичен лекар, како што информираше министерот за здравство, Венко Филипче, исто така ќе може да се вакцинираат. Информации за термините ќе може да добијат директно на пунктови каде се одвива вакцинацијата на деца.
Здравствените власти апелираат дека единствен начин за превенција од нов силен бран и ширење на опасниот делта сој е што помасовна имунизација. До вчера кај нас биле детектирани десетина случаи со делта сој, а ниту еден од нив не бил вакциниран.
Паралелно со децата, продолжува и вакцинацијата на возрасното население, а пред една недела почна и теренската имунизација.
Љубица Балабан
