По најавата на Антикорупциската комисија дека ќе го оспори пред Уставниот суд Законот со кој се овозможува изградбата на автопатиштата, односно Коридорите 8 и 10, премиерот Зоран Заев денеска на новинарско прашање што доколку падне Законот пред Уставен одговори на шеговит начин:
– Ако падне ќе скрши нога, рака, нешто… Ако падне тогаш одлуката на Уставниот суд е конечена. Тогаш одиме повторно со постапките коишто значат две алтернативи, едната е традиционална постапка којашто државата ја има, а тоа значи проектирање едно три – четири – пет години, па после тоа значи избор на изведувачи, надзори и слично, изјави премиерот Зоран Заев.
Сепак, доколку Уставниот суд одлучи дека Законот за Коридорите 8 и 10 е неуставен, Владата тоа ќе го почитува. А, премиерот не очекува таков потег.
– Искрено верувам дека моделите којшто се веќе развиени во Хрватска, Србија, Албанија и Косово се исти како нашите. Уставите нѝ се исти, така што верувам дека и уставноста е загарантирана. Но, да не прејудицираме, да видиме Уставниот суд како ќе одлучи, вели Заев.
Антикорупционерите сметаат дека актуелниот Закон овозможува ограничување на конкуренцијата и избегнување на фер натпревар. Државната комисија за спречување корупција од уставните судии побараа да ги стопира сите чекори на договарање меѓу Владата и конзорциумот „Бехтел – Енка“, сè до носење на финална одлука од Уставен.
Ваквиот чекор на антикорупционерите следи откако од шефот на државата, Стево Пендаровски, побараа да не го потпишува указот за Законот за стратешко партнерство со „Бехтел – Енка“, а тој стави свој потпис со образложение дека Законот е донесен со потребното мнозинство на пратеници, а никој не гласал против. Покрај можностите за корупција, ДКСК наведе дека фирмите ги следат низа скандали за изградбата на автопатските решенија во регионот. Станува збор за законско решение, преку кое Владата директно избира конзорциум за да ги гради Коридорите, а притоа да не се отвори тендерска постапка.
Во самиот Закон е наведено дека „Бехтел – Енка“ треба да ги гради Коридорите 8 и 10. Станува збор за автопатите Тетово – Гостивар – Букојчани, Требеништа – Струга – Ќафасан, како и Прилеп – Битола.