Рамуш Харадинај денеска со свеченост во Тетово беше прогласен за почесен граѓанин. Признанието му го додели градоначалникот Сади Беџети, покрај негодувањата на советниците Македонци.
Поранешниот лидер на ОВК и претседател на Алијансата за иднина на Косово Рамуш Харадинај денеска во Советот на Тетово ја прими титулата почесен граѓанин на општината.
„Во Тетово се чувствувам како дома“ изјави Харадинај и дополни: „Тетово е нашата историја и решеноста да се оди напред. Оваа чест не е само за денес, туку и за иднина. Ви ветувам дека никогаш нема да ве разочарам и посрамам“, изјави Харадинај.
Признанието му го додели градоначалникот Сади Беџети.
„Ние се восхитуваме од неговата биографија, се гордееме со неговото дело и иразуваме длабока почит на универзалните и националните заложби“, изјави градоначалникот на Тетово Сади Беџети.
Советниците Македонци ја бојоктираа седницата, а државниот инспекторат за локална самоуправа изјави дека одлуката е донесена без Бадинтерово мнозинство.
Во образложението стои дека Харадинај е значајна политичка фигура која имала голема заслуга за унапредувањето на човековите права, синоним за храброст и заштитник на демократијата и хуманите вредности.
Членовите на партијата Достоинство, кои изутрината тргнаа кон Тетово, го откажаа потестот пред зградата на Општината, каде имало поголема група Албанци за да не дојде до инцидент.