Стравот се зголемува за жените и девојките во Авганистан, откако Талибанците им порачаа на работничките да останат дома, признавајќи дека не се безбедни во присуство на војниците на милитантната група, зашто тие не се обучени да ги почитуваат.
Портпаролот на Талибанците, Забиула Муџахид, на прес – конференција во вторникот рече дека жените не треба да одат на работа поради сопствената безбедност, со што ги поткопа напорите да се убедат меѓународните набљудувачи дека групата ќе биде потолерантна кон жените отколку кога биле последен пат на власт.
Упатството дојде истиот ден кога Светска банка го прекина финансирањето во Авганистан, повикувајќи се на загриженост за безбедноста на жените, и за неколку часа откако ОН повикаа на „транспарентна и брза истрага“ за извештаите за кршење на човековите права по преземањето на Талибанците.
Муџахид рече дека упатствата да останат дома ќе бидат привремени и ќе и овозможат на групата да најде начини да осигура дека жените не се „третирани на непочитувачки начин“ или „не дај Боже, повредени“. Тој призна дека мерката е неопходна бидејќи талибанските војници „постојано се менуваат и не се обучени“.
„Среќни сме што влегоа во зградите, но сакаме да бидеме сигурни дека нема да се соочат со грижи“, рече тој. „Затоа, ние ги замоливме да земат одмор од работа додека ситуацијата не се врати во нормален ред и не се воспостават процедури поврзани со жените, а потоа ќе можат да се вратат на своите работни места откако ќе објавиме“.
Кога последен пат беа на власт помеѓу 1996 и 2001 година, милитантната група им забрани на жените да работат , ги спречи да излезат од домот без придружба и ги принуди да го покриваат целото тело.
По влегувањето на Талибанците во Кабул, салоните за убавина и рекламниот материјал со фотографии на жени беа испрскани со боја..
Групата инсистираше на тоа дека нивната нова ера на чело на државата ќе биде поумерена, но талибанските водачи одбија да гарантираат дека правата на жените нема да бидат одземени, а многу од нив веќе се соочија со насилство.
Џон Фишер, директор во Женева Хјуман рајтс воч, во изјава рече дека ОН „не успеаја да создадат силно тело за следење на човековите права и да ја исполнат својата одговорност за заштита на авганистанскиот народ“. Тој рече дека резолуцијата „претставува шлаканица за авганистанските бранители на човековите права и активистките за правата на жените, кои ужасно гледаат како владеењето на правото се распаѓа околу нив“.