Published: Thursday, September 2, 2021 16:29
Но еден млад Авганистанец веќе побарал помош од психолог и тоа веќе се организира да му се обезбеди, а 55 лица се заинтересирани да примат вакцина против коронавирусот…
Користат во исхраната маслиново наместо сончогледово масло, пијат повеќе чај отколку вода, а лебот е малку поразличен од нашиот…Откако пред пет дена стасаа во Македонија, првата група од 149 бегалци, кои се сместени во хотелот Белви на периферија на Скопје, полека се прилагодува на животот во друга земја, на 4.000 километри оддалеченост од нивниот роден Авганистан…А за полесно да се адаптираат, тие ќе имаат и курсеви по странски јазик и компјутери, детско катче, а ЈСП ќе ги вози секој ден за Скопје.
Но бегалскиот живот сепак не е лесен – еден млад Авганистанец веќе побарал помош од психолог и веќе се организира таа да му се обезбеди, а една третина од пристигнатите или 55 лица се заинтересирани да примат вакцина против коронавирусот…
И пакети за „добредојде“, со инфо флаери за град Скопје
Бидејќи се уште не е дозволено да направиме репортажа и директно да поразговараме со некој од нив, сликата за тоа како се сместени и што може да очекуваат за време на тримесечниот престој во Македонија, која широко ги отвори вратите за да им ги олесни страдањата, ни ја доловува Сузана Тунева Пауновска, секретар на Црвениот Крст на град Скопје.
Оваа организација е главна логистика и за бегалците од Авганистан.
Во врска со тоа што досега обезбедиле за бегалците и што тие најчесто бараат, Тунева раскажува:
– По прифатот на скопскиот аеродром, активистите на Црвениот Крст на град Скопје поделија основни пакети за хигиена и дезинфекција, како и пакети за „добредојде“ со инфо флаери за град Скопје. На бегалците од Авганистан им поделивме и инфо флаери за ковид-мерките во државата, и дополнителни хигенски средства. Исто така, направена е и дистрибуција на хигиенски пакети за мажи, жени, деца и бебиња, но и облека и обувки – вели Тунева и додава дека тие најчесто бараат да се задоволат нивните основни потреби, бидејќи немаат ништо, освен најнеопходните работи што ги земале со себе пред да го напуштат Авганистан.
Детско катче, курс по странски јазик
Таа најавува дека тие ќе имаат можност и за други активности.
– Во процедура е и отварање на детско катче и Центар за комуникација со компјутери. Исто така, ќе се започнат и активности за неформално образование, за посета на курс по странски јазик за овие три месеци, додека се тука – вели Тунева.
За тоа има ли големи разлики во начинот на живеење, на што се вчудовидуваат најмногу бегалците од Авганистан и дали и кога ќе почнат да се движат и вон хотелот, таа појаснува:
– Да, секако дека има разлики во културата на живеење, на пример, користат маслинов зејтин, пијат повеќе чај од вода, лебот е поразличен од нашиот и слично. А ќе имаат можности за движење и за тоа сме во преговори со ЈСП да имаме автобус два пати во денот. Инаку, за тоа во каква здравствена состојба се наоѓаат овие лица, сите се ПЦР негативни, а 55 лица се заинтересирани за вакцина. Генерално, бегалците коишто пристигнаа во Скопје се здрави, со исклучок на лица кои имаат потреба од терапија за шеќер и зголемен крвен притисок. Има и 4 жени трудници меѓу нив -додава секретар Тунева Пауновска.
Сите активности на Црвениот крст- Скопје се поддржани од страна на Фондацијата отворено општество.
Љубица Балабан
