Затвореникот Зоран Милевски – Кичеец ќе мора порано да влезе зад решетки. Судија на претходна постапка му одреди ефективен притвор од 30 дена, откако обвинителството го осомничи дека тој ја предизвика сообраќајката кај Стража. Оваа мерка важи веднаш, иако е на сила одлуката на Управата за извршување на санкциите со која Кичеец до 9 септември е слободен човек.
Судот во Гостивар на Зоран Милевски – Кичеец му одреди 30 дневен притвор. Ваква одлука донесе судија на претходна постапка откако гостиварското обвинителство ја побара таа мерка.
Кичеец е осомничен за тешки дела против безбедноста на луѓето и имотот во сообраќајот, откако во саботата, според обвинителството, предизвика сообраќајна несреќа на патот Гостивар – Кичево во која едно лице загина, а седум други беа повредени. ОЈО Гостивар наведе дека Кичеец претекнал на две полни линии и се судрил со две возила.
Со мерката за притвор на судот во Гостивар, Кичеец ќе мора порано да се врати во затвор. Тој сега ќе мора да биде сместен во притворско одделение, а не во струшкиот затвор бидејќи тоа е Казнено поправен дом од отворен вид, каде требаше да се јави на 9 септември. На него му е одобрен 30 дневен прекин од Управата за извршување на санкциите, по медицинско мислење на доктори од болницата „Св. Стефан“ – Охрид кои препорачале да се лекува од стрес, тахикардија и тешко дишење.
Зоран Милевски – Кичеец е осуден на три години затвор за случајот „Рекет“, откако призна вина. Во овој случај Бојан Јовановски – Боки 13 доби девет години затвор, а поранешната шефица на СЈО, Катиа Јанева е осудена на седум годишна затворска казна.
ОЈО Гостивар побара притвор за Зоран Милески Кическиот за сообраќајката кај гостиварско Ново Село