Екипите од Центарот за јавно здравје во Скопје го продолжија тестирањето во средното медицинско училиште „Панче Караѓозов“.
Започна скринингот за ковид-19 на 258 ученици во средните училишта во Скопје и во училиштата во земјата, а први утринава се тестираа 68 средношколци од СУГСГ „Зеф Љуш Марку“ и сите се негативни. Тестирањето во 10.30 часот продолжува во средното медицинско училиште „Панче Караѓозов“, а денеска на ковид-19 се проверуваат и учениците во Кривогаштани, Берово, Вевчани, Дебарца, Демир Капија, Дојран, Зрновци, Конче, Лозово, Могила, Новаци, Пехчево, Старо Нагоричане и Центар Жупа.
Директорот на СУГСГ „Зеф Љуш Марку“ , Фарук Зекири за НоваТВ изјави:
– Еве само што заврши тестирањето за ковид-19 на нашите ученици и добро е – сите се негативни! Се тестираа 68 од пријавени 69, а брисеви во голема сала од училиштето им земаа екипи од Центарот за јавно здравје Скопје. Учениците се вратија на настава – ни рече Зекири.
Екипите од ЦЈЗ го продолжија ковид-тестирањето во средното медицинско училиште „Панче Караѓозов“.
– Кај нас ќе се тестираат 95 ученици од прва до четврта година и за скринингот определивме посебна просторија. Немаше никаков проблем за одзивот на тестирањето, бидејќи нашите ученици секако се проверуваат за ковид-19 кога одат на пракса – ни рече директорката Маја Салиу.
Љубица Балабан