Бугарскиот претседател Румен Радев до крајот на оваа недела ќе соопшти кога ќе го свика 47-то Народно собрание.
-Пред парламентарните партии се две важни задачи – формирање влада врз основа на стабилно парламентарно мнозинство и усвојување на државниот буџет. Овие задачи бараат многу добар баланс, време за дијалог и приближување на позициите, изјави Радев пред новинарите. Тој посочи дека до крајот на неделава, во поглед на овие два приоритета, ќе соопшти кога ќе го свика новиот парламентарен состав.
Претседателот Радев повторно изрази сочувство за трагичните инциденти во домот за стари лица во село Ројак и автобуската несреќа на автопатот „Струма“. -Заедно сме со нашите браќа од Република Северна Македонија и заедно жалиме во оваа трагедија, се надеваме дека преживеаните ќе закрепнат што е можно поскоро, рече Радев.
Тој рече дека бугарската држава прави се што е потребно за да се обезбеди медицинска помош и да се откријат причините за овие два сериозни инцидента. Претседателот денеска оствари телефонски разговор со претседателот на Република Северна Македонија Стево Пендаровски и се сретна со премиерот Зоран Заев. Претседателот Радев на средбата со Заев посочи дека Република Северна Македонија може да се потпре на Бугарија, како и во сите кризи досега.
Претседателот Радев во Софија присуствуваше на завршниот состанок на Сесијата на Комитетот на ополномоштени претставници на земјите-членки на Заедничкиот институт за нуклеарни истражувања во Дубна, Русија. Домаќин годинава на сесијата е Бугарија, а 2021 година е прогласена за година на нашата земја на Заедничкиот институт за нуклеарни истражувања.