Здружението на новинари на Македонија (ЗНМ) најави дека ќе се жали во Европскиот суд за човекови права во Стразбур откако Уставниот суд одлучи дека исфрлањето на новинарите од галеријата на 24 декември 2012 година било „поради нивната безбедност“. Претседателот на ЗНМ Насер Селмани оваа одлука ја оцени за „скандалозна, апсурдна и опасна по демократијата“. Меѓудругото, Селмани истакна дека во образложението на Уставниот суд како аргументација дека нивната безбедност била навистина загрозена биле дадени неточни наводи дека врз новинарите се фрлало со тврди предмети.
„Апсурдно е Уставниот суд да тврди дека новинарите биле загрозени. Најодговорно тврдиме дека никој не фрлаше кон новинарите. Не бевме загрозени, не бевме дел од инцидентот и не учествувавме во него. Каква е таа проценка, дека новинарите се позагрозени од пратениците на власта и членовите на владата што останаа во собраниската сала. Уставниот суд се стави во одбрана на една очигледна злоупотреба на законодавната и извршната власт, и ги охрабри институциите во иднина уште подрастично да го ограничуваат правото на слобода на изразување и слобода на медиуми“, рече Селмани.
Селмани даде коментар и на вчерашното интервју на премиерот за новинската агенција МИА во кое што тој оцени дека Македонија е земја со слободни медиуми, а дека констатациите дека тоа не е така се „надуен балон“ и производ на одредени новинари кои од поинакви мотиви зборуваат лошо за слободите во земјата.
„Премиерот нека погледне неколку извештаи од Европската Комисија и нека ги погледне забелешките во однос на слободата на изразувањето во Македонија. Ако е заинтересиран за евроинтеграциите на Македонија, тогаш по нив треба и да постапува“ рече Селмани.