Дури и кај првачиња се открива состојба на анксиозност и на депресија велат психијатри за НоваТВ од Службата за ментално здравје на деца и младинци „Младост“ во Скопје.
Алармантни податоци денеска обелоденија Државниот завод за статистика чие истражување покажало дека девет проценти од децата кај нас кои се на возраст од 5 до 17 години имаат анксиозност, додека два проценти страдаат од тага или депресија.
Овие фрапантни бројки се од Мултииндикаторското кластерско истражување (МИКС) на ДЗС, спроведено во текот на 2018-2019 година, како дел од Глобалната програма за состојбата на децата и жените.
Д-р Биљана Аризанкоска Ефтимова, психијатар и раководител во Службата за ментално здравје вели дека имаат се повеќе пациенти меѓу најмалите.
На прашањето поради кои психички проблеми родителите и старателите најчесто ги носат на преглед своите деца и бараат стручна помош, таа објаснува:
– Ни доаѓаат во амбуланта деца со анксиозно растројство, со опсесивно-компулсивно растројство, но ни се јавуваат и деца со депресивни состојби и со нарушување во однесувањето. Овие состојби најчесто се предизвикани од ситуацијата со ковид пандемијата – вели д-р Аризанкоска Ефтимова, која е и раководителка на Службата за ментално здравје за деца и младинци.
Во врска со тоа кое е најмладото дете кај кое се развиле симптоми на анксиозност и депресија, а коешто се јавило на преглед кај нив, таа одговара:
– Уште од најмала возраст доаѓаат во амбуланта поради овие состојби и тоа, забележуваме последниве месеци, се почесто нѝ доаѓаат. Има деца на различна училишна возраст, но најмали се првачињата – и дел од нив се, за жал, во анксиозна состојба. Дури има и депресивни деца, иако се на многу рана возраст. Кај нив се јавува страв, вознемиреност, но има и деца кај кои се развила и сепарациона анксиозност – кога стравуваат дека ќе им се случи нешто на нивните најблиски, објаснува д-р Аризанкоска Ефтимова.
Таа нагласува дека овие состојби кај децата најчесто се предизвикани од ситуацијата со ковид пандемијата, која ги затвори дома и децата и возрасните и максимално ги ограничи дружењата со врсниците.
– Добро е што децата тргнаа на училиште. Тие мора да излегуваат надвор, да разговараат со своите родители, а не да се затвараат сами во соба и да се „дружат“ само со мобилниот телефон и со компутерот. Се разбира, родителите треба да побараат и стручна помош штом ќе забележат симптоми на нарушено однесување кај детето – порачува психијатар д-р Аризанкоска Ефтимова.
Симптоми кои се јавуваат кај состојба на анксиозност се замор, главоболки, повраќање, гадење, тресење на рацете и нозете, болки во мускулите, тешкотии при голтање и дишење.
Исто така, се јавува и намалена концентрација, тремор, препотување, немир, несоница, топли бранови, а еден од симптомите може да е и чешање и тешкотија анксиозноста да се контролира. Ако овие симптоми се јавуваат постојано во последните шест месеци, тогаш станува збор за состојба на анксиозност.
Љубица Балабан