Постојат сериозни изгледи до 2028 година уште една земја од Западен Балкан да стане членка на Европската Унија, Северна Македонија има место, но усвојувањето на уставните измени и натаму останува неопходен услов за следен чекор во пристапниот процес, изјави на денешната заедничка прес-конференција со премиерот Христијан Мицкоски, еврокомесарката за проширување Марта Кос.
Во сржта на пристапниот процес секако се реформите кои ќе придонесат кон попросперитетна економија и подобар животен стандард за сите граѓани. Остварувате охрабрувачки напредок и сакаме да ја поздравиме зголемената посветеност на Владата во исполнувањето на реформите. Но, усвојувањето на уставни измени останува неопходниот чекор за формално почнување на пристапните преговори. Ја охрабрувам Владата да го почне процесот што ќе донесе усвојување на уставните измени – истакна еврокомесарката Кос.
Таа повтори дека Европската Унија функционира врз доверба, а на новинарско прашање како да се изгради доверба со земја членка која не ги признава македонскиот јазик и идентитет, Кос посочи:
Довербата е важна, но како ќе ја изградиме довербата? Нема рецепти за тоа. Јас не сум онаа која може да ви дава совети за тоа како да изградите доверба со вашите соседи. Но она што го знам е дека колку повеќе доверба имате, толку полесно ќе напредувате низ пристапниот процес. Можеме да ја изградиме довербата, не само со добри зборови, туку и со добри дела, со избегнување дејства и зборови кои зголемуваат тензија, со почитување на меѓународното право, со решавање на спорови по мирен пат.
Еврокомесарката посочи дека граѓаните и компаниите веќе ги чувствуваат придобивките од приближувањето кон Европската Унија, наведувајќи дека следуваат преговори за укинување на роамингот, нови можности преку програмата „Еразмус плус“, поврзување со европските иницијативи за вештачка интелигенција, пристап до европските програми за здравство и зајакнување на сајбер-безбедноста и нагласи дека полноправното членство ќе донесе уште поголеми придобивки.
Кос истакна дека е потребен заеднички меѓупартиски консензус за Изборниот законик.
За заеднички меѓупартиски консензус за да може да имаме 100% успех, и се надевам дека тоа ќе се случи. А кога тоа ќе се случи, тоа ќе биде во полза на државата, затоа што пристапните преговори ќе се придвижат нанапред. Реформската агенда и она што го правите во Планот за раст, и од друга страна пристапниот процес, во одреден дел ќе се спојат. Северна Македонија тогаш може многу побрзо да се приклучи кон оние напредни земји – рече Кос.
Премиерот Христијан Мицкоски посочи дека очекува европската интергација да остане процес што се темели на јасни критериуми, на вредности и на исполнување на реформските обврски, а не процес оптоварен со билатерални прашања, кои создаваат неизвесност и фрустрација кај македонските граѓани.
Тој оцени дека денешната посета на Кос е можност за отворен, искрен и суштински разговор за македонската европска перспектива, за реформите што земјата ги спроведува и за потребата, како што нагласи, проширувањето да остане доследно на принципите на ЕУ – доверба, предвидливост, еднаков третман и почитување на достоинството на секоја држава кандидат.
-Верувам дека денешните разговори ќе придонесат за подобро меѓусебно разбирање и натамошно зајакнување на партнерството со ЕУ, засновано на доверба, почитување и заедничка одговорност за стабилноста и просперитетот на регионот – изјави премиерот.