Сведок во судскиот предмет „Плацеви на Водно“ денеска беше Кирил Божиновски, поранешен генерален секретар на ВМРО ДПМНЕ и генерален секретар на владата на Груевски.
„Дали некогаш сте му дале во готово пари на Груевски? “ праша одбраната, на што сведокот одговори негативно. Тој одговори дека многу ретко влегувал во кабинетот на Груевски во старата зграда на ВМРО ДПМНЕ и дека не се сеќава дали имало сеф таму.
На сведокот му беа поставени и прашања за поранешниот директор на ЕЛЕМ Влатко Чинговски кој сведочеше на почетокот на минатиот месец дека добивал материјали и документи со назнака дека се за генералниот секретар во тоа време – Кирил Божиновски.
– Кога јас бев именуван за генерален секретар, Чинговски беше разрешен од функцијата во ИК на партијата и сум немал контакти, но како генерален секретар на владата тој често ми доставуваше информации. Притоа класифицираните информации доаѓаа лично до мене кои јас ги распоредував, рече сведокот.
Не можам да се сетам на конкретен разговор со Чинговски или за приговарање во врска со содржината на пратките, додаде сведокот.
Дали бевте блиски со Груевски, праша одбраната, на што сведокот рече дека приватна комуникација немал и дека неговите контакти биле во рамки на работата и функцијата што ја извршувал. Адвокатот на Груевски го праша и дали поранешниот премиер му кажал дека купил земјиште, дали имал желба да купи земјиште и дали купил станови во Скопје, сведокот повторно одговори со „не“.
Сведокот одговори со „апсолутно не “, кога одбраната го праша дали Груевски барал од него некакви услуги за купување земјиште во негово име. Сведокот појасни дека контактите со Чинговски биле во времето кога тој ја извршувал функцијата во тогашната влада како генерален секретар и исклучиво за активности поврзани со ЕЛЕМ и Владата.
На прашање на судијата Трпков, дали Чинговски му донел финансиски средства некогаш, сведокот кратко одговори – „апсолутно не“.
Чинговски, пак, кога сведочеше се пожали дека како поштар доставувал пратки кои биле наменети за Божиновски, а кои никогаш не ги отворал, но изрази сомневање дека можеби во нив имало и пари.
Како сведок на одбраната денеска се појави и лиценциран вештак кој во детали објасни дека кога општината Центар го усвоила Деталниот урбанистички план парцелите на 18 јули 2014 од земјоделското земјиште станале градежно земјиште, наменето за градби за домување во станбени куќи.
На денешното рочиште требаше да сведочи и поранешниот телохранител на Груевски, Дејан Митревски Урко, но овој сведок во судница ќе дојде на следното рочиште на кое се очекува свои искази да дадат и Коце Трајановски, поранешниот градоначалник на Скопје како и Александар Бичиклиски од ВМРО ДПМНЕ.
Освен Груевски, обвинети во овој предмет се и бизнисменот Орце Камчев, неговата мајка Ратка Куновска-Камчева, Сашо Мијалков, Ристо Новачевски и Ненад Јосифовиќ. Првообвинет е експремиерот Никола Груевски, кој избега во Будимпешта и нему му се суди во отсуство.
Камчев, неговата мајка, како и Новачевски и Јосифовиќ се товарат за перење пари, додека Мијалков е обвинет за помагање во делото перење пари.