Линијата 112 на која граѓаните што ќе имаат потреба од итна помош при незгоди од денеска е пуштена во употреба. Првите десетина дена, додека се тестира, ќе биде достапна само на територијата на главниот град Скопје.
„Северна Македонија се усогласува со ЕУ каде 112 е единствен повикувачки број. Наместо досегашните 192, 193, 194 и 195, односно полиција, брза помош, противпожарна единица или ЦУК, граѓаните со единствено бирање на 112 може да ја добијат било која услуга односно да добијат помош за било каков итен случај“, рече директорот на ЦУК, Стојанче Ангелов и додаде дека за почеток линијата ќе функционира само на територијата на Град Скопје, а за десетина дена ќе може да се користи низ целата држава.
Според надлежните, се работи за комплексен систем кој во себе обединува неколку различни субјекти, министерства, противпожарните единици, кои се децентрализирани односно работат како дел од локалната власт и итната медицинска помош.
„На пример, при тешка сообраќајна несреќа, во која има повредени патници заглавени во возилото, со вртење на бројот 112, нашиот оператор веднаш ја гледа локацијата од каде што доаѓа повикот, без разлика дали се јавуваат од мобилен или од фиксен телефон, па дури и ако повреденото лице зборува неразбирливо, нашиот оператор врши проценка и веднаш јавува во МВР. Оттаму веднаш се испраќа полициска патрола, здравство испраќа екипа на ИМП, а по потреба, доколку луѓето треба да бидат извлечени од возилото, или доколку постои опасност од пожар нашиот оператор ги известува и територијалните противпожарни единици“, рече Ангелов.
Постоечките броеви за итни повици, 192, 193, 194 и 195 ќе продолжат да функционираат уште една година.
Евроамбасадорот Дејвид Гир ја поздрави иницијативата и рече дека ова е практична помош која Северна Македонија ја добива од ЕУ.
„Убавината во овој случај е во едноставноста. Вртите еден број, 112 и добивате услига од сите итни сервиси. Во таа насока, граѓаните ќе се чувствуваат побезбедни, а помошта ќе пристигне побрзо“, рече Гир.
Премиерот Димитар Ковачевски, кој присуствуваше на промоцијата, рече дека единствената линија за итни случаи со тек на време ќе биде унапредувана.