Под покровителство на премиерот Ковачевски, денеска во Скопје се одржува трибина на која француски и македонски спортски работници разговараат за тоа како спортот да се стави во функција на надворешната политика. На отворањето на трибината се обрати министерот за надворешни работи Бујар Османи кој нагласи дека му е особено мило што оваа тема се актуелизира во момент на француското претседателство со Европската Унија , дотолку повеќе што Франција е единствената земја во светот која има амбасадор за спорт а тој амбасадор Флоренс Фишер денеска учествува на оваа меѓународна трибина. Иако министерот Османи рече дека нема настанот да го „гуши“ со политика, сепак не ја испушти приликата да ги соопшти очекувањата од Француското претседателство со ЕУ.
„ Драго ми е што Франција која е претседавач со Европската унија а за нас е важно, затоа што го поддржува процесот на интеграција на Западен Балкан со јасно поставени стандарди и сите очекуваме оваа динамика да резултира со одлука за старт на преговорите со Унијата до крајот на јуни, рече министерот Османи.
Од своја страна францускиот амбасадор Сирил Бомгартнер рече дека жали што концептот на спортска дипломатија е помалку проширен и се знае за него , а и тоа како е концепт кој може да помогне земјите да ги надминат недоразбирањата меѓусебе во спортски дух , бидејќи спортот значи стратегија на терен како што е стратегија и самата дипломатија. Бомгартнер истакна дека спортот во функција на дипломатијата би можел да даде резултат и во надминувањето на спорот меѓу Северна Македонија и Бугарија како нов пристап, кој очекуваме да даде резултати, рече францускиот амбасадор.
„ Франција разви спортска дипломатија што е своевидна авангарда, со тоа што прв пат амбасадор за спорт беше назначен во 2014 година, а актуелниот амбасадор е назначен во 2019 година. Спортот е одлична можност за промоција на земјата , само колку спортски новинари ја посетиле Франција и затоа спортот има важна улога за време на француското претседавање со ЕУ, за кога се закажани две тематски спортски конференции, изјави францускиот амбасадор Сирил Бомгартнер, на конференцијата за значењето на спортската дипломатија.
(М.Т.)