Ќе се тестираат основците, бидејќи таму имало најголем број на заразени.
Зголемениот број на позитивни ученици во основните училишта го вклучија алармот, па Комисијата за заразни болести најави дека од утре ќе почне најавениот скрининг во училиштата.
Тестирањето ќе биде со брзи тестови, а ќе се тестираат само ониое деца чии родители ќе дадат пишана согласност. Скринингот ќе се врши само во основните училишта, бидејќи како што посочија од Комисијата, епидемиолошката состојба во средните училишта била мирна.
„Комисијата за заразни болести донесе заклучок внимателно да се следи состојбата во училиштата и доколку се утврди било какво зголемување на бројките на новозаразени да се направи скрининг во училиштата за да се утврди реалната состојба и да се спречи поширока трансмисија помеѓу учениците. Загрижувачките бројки што ги добивме од основните училита, беа аларм да почнеме еден ваков скрининг кој што ќе ни покаже каква е трансмисијата во основните училишта“, рече портпаролот на Комисијата, доктор Злате Мехмедовиќ.
Претседателот на Комисијата за заразни болести, Александар Петличковски, пак најави дека од денеска, препораките за лекување на ковид позитивни пациенти, зо кои долго се зборуваше во јавноста, им се достапни на сите лекари на сајтот на Министерството за здравство.
„Се работи за препораки, а не за протоколи. Тоа се сеопфатни материјали на 40-тина страници кои се базирани на докази. Овие препораки се веќе четврта или петта верзија на постоечки препораки кои се користеле во минатото, но и претрпувале промени. И оваа верзија е од септември минатата година. Материјалите се наменети како водич и немаат обврзувачки карактер, но се тука да им послужат на сите лекари кои работат со Ковид позотивни пациенти, од едно место да се црпат информации“, рече Петличковски, додавајќи дека во препораките има информации за секоја фаза на болеста, од тестирање, до лекување и кога е време за хоспитализација.
Од Комисијата излегоа и со конкретен став дека лекот „Ивермектин“, кој со месеци беше еден од најупотребуваните лекови кај пациентите со Ковид-19 во рана фаза на болеста, не помага во лекување на корона вирусот.
(Б.Б.)