Претседателот на МАНУ, Љупчо Коцарев на годишното собрание на највисоката македонска научно уметничка институција, одржа говор со скандалозни тези за кои рече дека биле негови лични ставови.
Според Коцарев, Договорите со Бугарија и со Грција, се извор на нестабилност во регионот и значат акти за разнебитување на Македонија. Тој ова го наведе говорејќи во контекст на три основни постулати на македонизмот и македонскиот опстанок, како што рече, меѓу кои автохтоноста на македонскиот народ и јазик во контекст на јазичниот, културниот и религиозниот континуитет.
Понатаму додаде дека супстратот го сочинуваат Македонците во државата но и Македонците во Грција и Бугарија, како граѓани на овие држави и Македонците во светот. Оттука сите договори што не се конзистентни со таквите премиси на македонизмот, а такви се договорот за добрососедство со Бугарија, Преспанската спогодба, како што ги оквалификува, претставуваат извор на сите наши витални проблеми и значат разнебитување на Македонија, рече Коцарев.
„Бугарскиот договор, Преспанскиот договор и промената на Уставот заедно претставуваат извор на нестабилност во регионот од едноставна причина што секоја држава што својата иднина ја гради врз нелегални и недостоинствени документи, а такви се трите документи наметнати од геополитичките игри на големите сили, е осудена на пропаст“, рече Коцарев.
Тој говореше за потребата да се промени изборниот модел, и да се премине на една изборна единица наместо досегашните шест.
„Ако Северна Македонија е граѓанско општество тогаш моделот треба да биде граѓанска консензуална демократија а не етничко консензуална“, рече тој.Коцарев повика и да се почнело со одземање на ингеренциите на централната власт и на државно и на локално ниво.
(Трпческа/Крамарска)