Поранешниот заменик-министер за одбрана Емил Димитриев, во изјава за НоваТВ вели дека граѓаните на нашата земја, се солидаризираат со украинскиот народ и се на страната на мирот и меѓународното право.
„Мој впечаток е дека развојот на настаните поврзан со Украина, т.е интензивирањето на воените дејствија е за осуда по повеќе основи. Ќе подвлечам само неколку. Ако тргнеме од најстарата дефиниција за војната како последен инструмент на политиката во конкретниов случај не сум сигурен дека докрај беа исцрпени сите политички солуции за мирна разрешница. Просторот за меѓународен дијалог како да беше прескокнат и многу бргу се премина кон воени дејствија. Вториот момент е кршење на меѓународното право како есенција на светскиот поредок. Тоа подразбира кршење на суверинитетот на земјите спротивно на меѓународните норми и принципи. Најголема штета од ваквата ситуација ќе бидат човечките жртви кои неминовно се за очекување. Понатаму, напуштањето на родните места и бегање од заканите имаат големи последици по граѓаните кои се изложени пред опасноста. Штетата по светската економија ќе биде евидентна. Се на се по кој знае пат ќе видиме дека во војните нема победници. Македонија како земја членка на НАТО треба да ги сподели сите предизвици кои произлегуваат од нашето членство, согласно националните ресурси. Граѓаните на нашата земја, се солидаризираат со украинскиот народ и се на страната на мирот и меѓународното право“, вели Димитриев за НоваТВ.