Меѓународната лизгачка организација (ISU) стави забрана за учество на меѓународните натпревари во уметничко лизгање за руските и белоруските натпреварувачи.
Во соопштението на организацијата се вели дека одлуката на Меѓународната лизгачка унија значи дека овие спортисти нема да се натпреваруваат на светското првенство од 21 до 27 март.
– Советот на ISU ја повторува својата солидарност со сите погодени од конфликтот во Украина и нашите мисли се со целиот украински народ и земја, се вели во официјалното соопштение на Меѓународната лизгачка организација (ISU).
Рускиот спорт продолжува да ги чувствува последиците од глобалното противење на руската инвазија врз Украина, поради тоа што се зголемува бројот на забранети руски спортски тимови.
Меѓународната одбојкарска федерација денеска соопшти дека на Русија ѝ е одземена организацијата на Светските првенства во одбојка во машка и женска конкуренција кои требаше да се одржат во август и септември.
Меѓународниот олимписки комитет на 28 февруари им препорача на меѓународните спортски федерации и организатори на настани да се воздржат од канење или дозволување „учество на руски и белоруски спортисти и претставници на меѓународните натпреварувања“.
Меѓународниот олимписки комитет исто така му го одзеде Олимпискиот орден на претседателот Путин, кој му го додели во 2001 година.
Претседателот на Рускиот олимписки комитет Станислав Поздњаков одговори дека категорично се противат на тие одлуки.
Светската фудбалска федерација ФИФА и Европската фудбалска федерација ја исфрлија Русија од Светското првенство и од сите меѓународни фудбалски натпреварувања на неопределено време.
Меѓународната хокеарска федерација објави слична забрана за Русија и Белорусија, а на Русија ѝ ја одзеде организацијата на Светското јуниорско првенство во хокеј во 2023 година.
Минатата недела Формула 1 ја откажа трката за Големата награда на Русија која требаше да се одржи на 25 септември во Сочи.