Националната опера и балет го откажа вечерашниов рецитал насловен како “Вечер на белканто и руски романси”, по бурните реакции во јавноста што еруптираа синоќа на социјалните мрежи.
Директорот Васко Ристов во изјава за Нова ТВ рече дека тоа бил концерт на студенти и дека е откажан во договор со организаторот.
„Ја почитуваме Резолуцијата што ја донесе Собранието на Република Северна Македонија и немам што повеќе да додадам”, рече тој појаснувајќи дека настанот е откажан и дека не е наведен друг датум за негово одржување.
Закажаниот рецитал предизвика бројни реакции бидејќи се работеше за дела на руски автори во ситуација кога светот се обедини во осуда на руската агресија врз Украина наметнувајќи и санкции на Русија кои опфаќаат економски и комуникациски мерки, но не е поштедена ни културата.
Режисер на рециталот е Дејан Прошев, а пијано придружбата требаше да биде на Андреј Наунов.
Меѓу делата што беа подготвени за изведување имаше дела на Перголеси, Скарлати, Белини, Чајковски и Дворжак.
(С.К.)