Вработените во А.Д. Пошта во недела излегуваат на протест.
Протестот ќе се одржи во 12.00 часот започнувајќи пред платото на Дирекцијата на АД Пошта на РСМ, каде потоа учесниците на протестот ќе се упатат пред Влада на Р.С. Македонија.
Од репрезентативниот Синдикат, Конфедерација на слободни синдикати на Македонија, информираат дека одлуката на Синдикалните организации на А.Д. Пошта на Северна Македонија, произлегла од „крајно алармантната состојба“, поради долгогодишното непочитување на работничките права и економско-социјалните интереси на вработените.
„Соочени сме со енормно зголемување на трошоците за живот во земјава кое како последица драстично ја намалија куповна моќ на жителите. Во вакви услови вработните во Пошта со нивните ниски плати кои кај повеќе од 70% од вработените се под или на ниво на минимална плата, не се во можност да обезбедат егзистенција и пристоен живот за нивните семејства, а особено имајќи го во предвид фактот што платите на вработените во Пошта не се покачени повеќе од 30 години. Затоа, повеќе од неопходно е потребно итно покачување на платите на вработените во Пошта“, велат од Синдикатот.
Покрај незадоволството и револтот на вработените од 30 годишното непокачување на платата, од ден на ден се повеќе е изразена нивната загриженост за иднината на компанијата и незадоволство од долгогодишните супстандардни услови за работа и необезбедени средства и опрема за работа.
„Синдикалните организации на друштвото ги исцрпеа сите правни и институционални механизми за реализација на барањата на вработените, со Претседателот и членовите на Управниот одбор се донесоа заклучоци за реализација на барањата на вработените, но и покрај тоа се нема слух за проблемите на своите вработени непридржувајќи се до договорените ставови, права и обврски. Се соочуваме со целосно блокирање на социјалниот дијалог, токму затоа, принудени од актуелната ситуација, вработените – членови на синдикатите излегуваат на општ протест за јавно да го изразат незадоволството и револтот за непочитување на нивните работнички права и достоинство“, се вели во дописот од Синдикалните организации на А.Д. Пошта.
Ќе побараат средба со Владата, со цел изнаоѓање заеднички прифатливо решение.