Се очекува денеска да се сретнат делегациите на Украина и Русија на нова рунда преговори, јави ДПА. Двата преговарачки тима сакаат дискусиите, што ќе се водат преку видео врска, да започнат утрово. Според Михаило Подолјак, советник на украинскиот претседател Володимир Зеленски „работните групи од двете страни работат интензивно“.
Последните украинско-руски разговори на високо ниво се одржаа во понеделникот, јави ДПА.
Подолјак предвидува дека разговорите за ставање крај на војната ќе продолжат уште неколку недели. Позицијата на руските преговарачи стана „поразумна“ и пореална, истакна тој, без да даде детали.
Русија сака Украина да остане неутрална земја и да се демилитаризира, како и да ги признае сепаратистичките региони во нејзиниот источен дел како независни држави.
Киев е подготвен на компромис за барањето за неутралност, но инсистира на силни гаранции од Западот за неговата безбедност. Сепак, украинските власти одбиваат да отстапат по прашањето за територијалниот интегритет на земјата, наведува ДПА.
Украинскиот претседател Зеленски инсистира на средба со неговиот руски колега Владимир Путин. Засега Кремљ одбива да ја разгледа таа опција.
Зеленски навести дека преговорите на високо ниво меѓу Москва и Киев може да се одржат во Ерусалим.
Зеленски во видео обраќање до граѓаните ги пофали напорите на израелскиот премиер Нафтали Бенет да ја преземе улогата на посредник. Тој изјави дека Израел вложува многу напори за организирање мировни преговори меѓу Русија и Украина.
„Веруваме дека разговорите со Русија ќе започнат порано или подоцна, веројатно во Ерусалим. Тоа е вистинското место да се најде мир, ако е можно“, рече Зеленски.
Амбасадорката на САД во ОН, Линда Томас-Гринфилд, изјави дека во моментов мала е надежта дека преговорите би можеле да донесат окончување на војната во Украина.
Таа смета дека мали се шансите за пресврт.
„Ги поддржавме преговорите што Зеленски се обиде да ги одржи со Русија, велам се обиде затоа што се чини преговорите се еднострани, а Русите не посочија каква било можност за дипломатско решение”, изјави Томас-Гринфилд. Таа тврди дека САД се обиделе да дејствуваат и претходно, но, како што рече, „дипломатските напори не беа добро прифатени од Москва ниту пак сега реагираат”.
„Се надеваме дека напорите на Украина ќе стават крај на бруталната војна”, рече таа.
Истовремено додаде дека извештаите за насилна депортација на илјадници жители од опколениот Мариупол се „вознемирувачки” и „неразумни”, доколку се вистинити.