Министерството за економија денеска ќе прави анализа како се спроведуваат антикризните мерки.
Министероот за економија, Крешник Бектеши вели дека анализата која ќе ја прават денеска, ќе ја презентираат на утрешната владина седница. Тој не ја исклучува можноста за носење на дополнителни мерки со цел да се намалат ценовните шокови.
„Ги објавивме 26-те мерки за заштита на стандардот на граѓаните во глобалната економска криза. Ние имаме и други механизми во Министерството за економија, но и во другите институции, како автономните мерки со кои можеме целосно да укинеме некои царински давачки кои се предвидени, имајќи предвид дека нашата држава, главно, трговијата ја има со ЕУ, согласно со договорот за стабилизација и асоцијација и согласно договорот со ЦЕФТА“, рече Бектеши во одговор на прашање.
Тоа, како што кажа, може да се прошири во случај ако продолжи војната во Украина.
„Би требало како и другите држави да мораме дополнително да се снабдиме со суровини и финални производи. Денеска во Министерството за економија ќе направиме анализа, а утре на седница на Владата ќе информираме како се спроведуваат мерките кои се во функција, а ако треба ќе донесеме и такви мерки, се со цел да ги намалиме ценовните шокови, посебно за производите кои се утврдени во одлуката и за кои е замрзната маржата, рече Бектеши.