Свечена церемонија по повод доделувањето на Орден за заслуги и Повелба на Република Македонија.
Актерката Милица Стојанова, оперската дива Милка Ефтимова и кошаркарката Стојна Вангеловска добија Орден за заслуги за Република Македонија на денешната свечена церемонија која се одржа во македонската Филхармонија.
Признанието Повелба на Република Македонија беше доделено на Факултетот за Драмски уметности, на Интернационалниот фестивал на филмска камера „Браќа Манаки“ и на Националната установа Турски театар.
Милица Стојанова се одликува со Орден за заслуги за Република Македонија за нејзиниот фундаментален придонес во основачките процеси на македонскиот театар, како и за воспоставување иновативни методи, високи критериуми и за нивен развој во современото актерско мајсторство и за афирмација на македонскиот театар и на македонскиот филм на национално и на меѓународно ниво.
Милка Ефтимова се одликува со Орден за заслуги за Република Македонија за нејзиниот исклучителен и траен придонес во развојот на оперското пеење, со што придонесе за афирмација на македонската оперска уметност на национално и на меѓународно ниво, како и за посветената и значајна педагошка активност.
Стојна Вангеловска се одликува со Орден за заслуги за Република Македонија за нејзините постигнати највисоки резултати во кошарката на домашен и на меѓународен план како играч и како тренер, како исклучителен придонес во македонската кошарка и на македонскиот спорт, воопшто.
На Факултетот за Драмски уметности се доделува признанието Повелба на Република Македонија по повод 50-годишното постоење и за суштински и траен придонес во развојот на театарската и на филмската уметност, како и на драмското творештво преку педагошка дејност и преку автономна и автохтона театарска и филмска едукација.
На Интернационалниот фестивал на филмска камера „Браќа Манаки“ се доделува признанието Повелба на Република Македонија по повод 40-годишното постоење и за значаен и непроценлив придонес во развојот на македонската кинематографија и за нејзина афирмација во светски рамки, како и за афирмација и популаризација на филмската уметност низ нејзиниот најспецифичен сегмент — кинематографијата.
На Националната установа Турски театар се доделува признанието Повелба на Република Македонија по повод 70-годишното постоење и за особени постигнувања на полето на театарската уметност и за нејзина афирмација и популаризација, како во земјата така и во странство.
Ордените и признанијата го додели претседателот на РСМ, Стево Пендаровски.
(Фотографиите се преземени од МИА)