Градоначалникот Орце Ѓорѓиевски денес го посети основното училиште „Св. Климент Охридски“, во кое од вчера се поставени нови дигитални табли. Истите се дел од донацијата која општина Кисела Вода ја обезбеди преку партнерство со Центарот за развој на Скопски плански регион и преку која, 16 вакви уреди се распоредени низ сите општински училишта.
Со ова, смарт уреди и услови за унапредување на наставниот процес, има во сите училишни објекти во општина Кисела Вода. Опремени се со 43 дигитални табли и 75 смарт телевизори.
-Денес сме во ООУ “Св. Климент Охридски” каде се поставени нови дигитални табли, како дел од проектот за осовременување на училиштата, преку стимулирање на дигиталните вештини и знаења. Имено, преку партнерство со Центарот за развој на Скопскиот плански регион обезбедивме 16 смарт табли за училиштата низ општината кои ќе овозможат дополнително унапредување на наставниот процес“, рече градоначалникот.
Ѓорѓиевски дополни дека општината преку донации обезбедила компјутер за секоја училница од сите 11 училишни објекти.Во “Св. Климент Охридски”, годинава настава посетуваат 418 ученици. Со денешната донација, во сите училници има дигитални уреди и можности за осовременување на наставата.