Германија ќе престане да користи руска нафта и гас „што е можно побрзо“, но ако го стори тоа веднаш ќе предизвика премногу економска штета дома, изјави министерот за финансии Кристијан Линднер.
Шефот на Комисијата на ЕУ, Урсула фон дер Лајен, изјави пак, дека Европската унија ќе воведе дополнителни санкции кон Русија, најверојатно за гасот и нафтата.
Вчера ЕУ ги објави своите планови да воведе петти пакет санкции кон Русија, вклучувајќи забрана за увоз на руски јаглен. „Овие санкции нема да бидат нашите последни санкции. Да, сега го забранивме јагленот, но сега треба да ја разгледаме и нафтата“, рече фон дер Лајен.
Линднер нагласи дека, според германскиот министер за економија Роберт Хабек, доколку веднаш се запре извозот на гас, на Германија ќе и се закани не губење на растот, туку економски структурен прекин. „Тоа би било неприфатливо“, рече Линднер.
„Прашањето е, во кој момент му нанесуваме повеќе штета на Путин отколку на самите себе?“, рече Линднер во интервју за Die Zeit. „Кога би можел само да го следам моето срце, веднаш би имало ембарго на сè. Сепак, не верувам дека тоа ќе ја запре воената машина на краток рок“, додаде министерот за финансии на Германија.