Обдукцискиот извештај за причините за смртта на 28-годишниот ракометар на РК Бутел, Денис Тот, се уште не е комплетно завршен, се чекаат токсиколошките и хистопатолошките анализи, изјавија од Институтот за судска медицина и криминалистика во Скопје, каде се вршеше обдукција на хрватскиот ракометар Денис Тот, кој почина во петокот на Клиниката за анестезија, реанимација и интензивно лекување (КАРИЛ) откако беше претепан до смрт во четвртокот изутрина пред дискотеката „Привилиџ“ во Градскиот парк во Скопје.
Во врска со тоа кога извештајот ќе биде испратен до ОЈО, директорот на Институтот за судска медицина и криминалистика, проф. д-р Александар Станков, за НоваТВ денеска изјави:
– Кога ќе бидат готови сите резултати, ќе го испратиме извештајот до Основното јавно обвинителство Скопје. Се уште се во тек токсиколошките и хистопастолошките анализи и откако ќе ги добиеме и тие резултати, ќе го доставиме обдукциониот наод, ни изјави проф.д-р Станков.
Првичниот наод од обдукцијата на Судска медицина покажа дека повреда на главата и мозокот се причина за смртта на ракометарот Тот.
За убиството на Тот се осомничени три лица, од кои две се веќе во 30-дневен притвор, К.Л.(19) и А.К.(22), а првоосомничениот, 28-годишен Анѓело Ѓоргиевски, е во бегство.
Од прерано починатиот млад ракометар денеска се простува неговото родно Ѓаково, каде ќе бидат погребани посмртните останки на Тот.
Од скопското Основно јавно обвинителство ни изјавија дека се преземаат активности за приведување и лишување од слобода на првооосомничениот во случајот со ракометарот Денис Тот и веднаш ќе ја информираат јавноста. Сите проверки на граничните премини се во надлежност на МВР, изјавија од ОЈО.
На прашањето дали првоосомниченото лице можеби досега веќе ја напуштило државава, министерот за внатрешни работи, Оливер Спасовски, вели дека засега немаат такви информации.
– За случајот има две лица приведени, а по едно лице се трага. За ова лице има централен распис, ќе се распише и меѓународна и домашна потерница, рече Спасовски.
Официјално, во МВР нема податок дека Анѓело Ѓоргиевски ја напуштил државата.
ОЈО Скопје во саботата соопшти дека на 7 април годинава во раните утрински часови пред ноќен клуб во Скопје дошло до вербална расправија помеѓу лицето Д.Т. (28) од Р.Хрватска, со привремен престој во РСМ и лицата А.Ѓ. (28), К.Л.(19) и А.К.(22) сите од Скопје.
Тројцата сега осомничени го нападнале хрватскиот државјанин и му задале повеќе удари со боксови и клоци. Од ударите сега починатиот паднал и со задниот дел од главата удрил во асфалт и изгубил свест. Тројцата осомничени продолжиле со дејствија на удирање по главата, а потоа, без да му укажат помош, заминале од местото на настанот. Лице вработено во ноќниот клуб повикало Итна медицинска помош по што сега починатиот бил пренесен на Ургентниот центар при Клиниките „Мајка Тереза“.
Љубица Балабан