Христијан беше ангел што одеше по земја, дваесет години го чував, се запиша на факултет, за да ми го земе пијаница кој сега е на слобода, а за мојот син ми велат нека почива во мир, како да почива во мир кога детето е убиено, расплакана и облеана во солзи не потсети на трагичниот настан од пред шест години мајката Данче Крстевска.
Таа со транспарент во рацете на кој беа испишани имињата на сите млади жртви во сообраќајни незгоди дојде на протестот пред Кривичниот суд да ја сподели својата болка, но да оддаде сочувство и поддршка за растреперените од болка родители на младата Викторија Николова чиј живот згасна на 20 јануари во сообраќајката кај Сити мол во Карпош.
– Чуваме деца за да ни ги газат по улиците, мојот син беше велосипедист, а беше прегазен на 20 септември од пијан возач со три промили алкохол во крвта. Тој ја одлежа казната од четири години и сега е на слобода, а јас го изгубив мојот син. За каква правда да зборуваме, кога пијаницата кој прво беше осуден на осум години затвор, откако се жалеше одлежа четири и сега е слободен и седи дома, низ солзи зборуваше мајката на Христијан кој загина кога во момчето удрил со автомобил скопјанец под дејство на алкохол во скопската населба Гоце Делчев на локалниот пат кон Петровец.
Според наодот на стручните лица во моментот кога се случила оваа сообраќајната несреќа возачот го управувал возилото со 2,43 промили алкохол во крвта и со неприспособена брзина. Тој не се придржувал кон прописите за учество во сообраќајот, а во моментот на незгодата бил со битно намалена пресметливост и тежок степен на пијанство. Возилото го управувал во насока од Велес кон Скопје, со недозволена и неприлагодена брзина кон условите и состојбата на патот и удрил во момчето кое се движело по десната коловозна лента во спротивната насока.
Животот на Христијан Крстевски, по неколку дена поминати во кома, згасна поради тешките повреди, а неговите роднини и другарчиња протестираа барајќи „Правда за Кико“ и безбедни улици за сите, како што денеска протестираа роднините и пријателите на Викторија Николова.
С.М