„Палата на неправда“, „три години за убиство на пешаци и три години за 150 ќебапчиња“, „ усмрти, признај, биди слободен“ се дел од пораките кои неколку десетици луѓе ги посветија на протестот „Правда за Викторија“ кој денес се одржа пред Кривичниот суд во Скопје.
Сестрата на Викторија, Лилјана Николова порача дека денеска бараат „повторно и повторно правда“, за неправедната пресуда и за целата неправда, која, како што кажа, „ни беше нанесена и сè уште ни се нанесува“.
-Овој протест е уште еден кренат глас до ова судство, до оваа неправдина која не боли до коска и оваа пресуда од судијката Љубинка Бошевска. Како да не сме луѓе, како да нè нема, како да се кријат во нивните удобни фотелји, а трњата ние ги газиме, ние патиме, ние губиме и човек и правдина и надеж. Бараме правдина за нашата сестра, ќерка, девојка, другарка, бараме нова пресуда со реални очекувања, зошто нема да запреме овде. Доста беше оваа тортура и ова лудило, рече Николова.
Адвокатот Владимир Михајловиќ изјави дека пресудата од тригодишна казна е под законскиот минимум според кој се предвидени казни од 4 до 20 години за вакво кривично дело.
-Да се земе за олеснителна околност тоа што сторителот бил млад е смешно, очекуваме Апелацискиот суд да ја земе предвид казната која е предвидена со закон. Ова не е само неправда кон Викторија, ова е порака за сите, тие осум отсто доверба во судството по изрекувањето на пресудата станаа нула отсто. Како да се бориме за правдата на странките кога некој друг ја стопира, изјави бранителот на семејството Николови.
Организатор на протестот е Леонид Даов, момчето на Викторија Николова која загина во сообраќајна несреќа, а во која Даов беше повреден.
Протестот се организира по изрекувањето на пресудата за случајот, според која возачот Јордан Ѓоргиев кој ја усмрти Викторија беше осуден на три години затвор. Ваквата пресуда за семејството на Викторија и за Леонид е премала. Таткото на 24 годишната почината девојка пред судот рече дека е згрозен од државата и дека поради вакви пресуди никој нема доверба во ова судство.