Украинскиот претседател Володимир Зеленски побара од Бугарија да и помогне на Украина за поправка на воената опрема оштетена во тековната војна со Русија, објави бугарската национална телевизија (БНТ).
Украинскиот амбасадор во Софија, Виталиј Москаленко, поднесе писмо од Зеленски до бугарскиот Парламент, во кое украинскиот претседател вели дека властите во Киев се надеваат дека Бугарија ќе помогне во поправката на украинската воена опрема и ќе продолжи да им помага на Украинците кои бегаат од војната.
Зеленски во писмото вели дека се надева оти Бугарија ќе продолжи да обезбедува и хуманитарна помош, вклучувајќи лекови, облека и храна. Тој се осврнува и на енергетската соработка меѓу двете земји и извозот на електрична енергија и гас од Украина во Бугарија велејќи дека ќе продолжи.
Според БНТ Зеленски во пораката до Бугарија изразил очекување и дека Бугарија ќе продолжи да ја поддржува Украина на нејзиниот пат кон интеграција во ЕУ.
Бугарскиот парламент денеска треба да одлучи дали ќе ја поддржи Украина со „воено-техничка опрема“.