Руските сили „мора да се соочат со правдата за серија воени злосторства“ извршени во регионот северозападно од Киев, соопшти денеска Амнести интернешнал на брифинг за новинари во украинскиот главен град по истрагата што ја спроведе во земјата.
Истрагата, заснована на „десетици интервјуа и опсежен преглед на материјални докази“, документира „незаконски воздушни напади врз Бородјанка и вонсудски егзекуции во други градови и села, вклучувајќи ги Буча, Андриевка, Здвиживка и Ворзел“.
Делегација на Амнести интернешнал разговараше со преживеаните, семејствата на жртвите и високи украински функционери, соопшти организацијата. „Моделот на злосторства извршени од руските сили што ги документиравме вклучува и незаконски напади и намерни убиства на цивили“, рече во изјавата генералниот секретар на Амнести интернешенел, Ањес Каламар.
„Сретнавме семејства чии најблиски беа убиени во ужасни напади и чии животи засекогаш се променија поради руската инвазија. Ние ги поддржуваме нивните барања за правда и ги повикуваме украинските власти, Меѓународниот кривичен суд и другите да обезбедат зачувување на докази кои би можеле да поддржат идно гонење за воени злосторства и изнесување на сторителите пред лицето на правдата“, рече таа.
За време на 12-дневните истраги, истражувачите на Амнести ги интервјуираа жителите во Буча, Бородинка, Нови Короход, Андриевка, Здвиживка, Ворзел, Макарив и Дмитривка и „посетуваа места на бројни убиства“, соопшти Амнести. Во Бородинка, Амнести интернешнал откри дека „најмалку 40 цивили биле убиени во непропорционални и неселективни напади, кои опустошиле цела населба и оставиле илјадници луѓе без покрив над главата“. Во Буча и неколку други градови и села лоцирани северозападно од Киев, Амнести документира „22 случаи на незаконски убиства од страна на руските сили, од кои повеќето беа очигледни вонсудски егзекуции“.
На 1 и 2 март, серија руски воздушни напади погодија осум станбени згради во градот Бородинка, во кои живееја повеќе од 600 семејства, соопшти Амнести. „Во ударите загинаа најмалку 40 жители и беа уништени зградите, како и десетици околни згради и куќи. Повеќето од жртвите беа убиени во подрумите на зградите, каде што бараа засолниште. Други починаа во своите станови“, соопшти Амнести.
Амнести повика сите одговорни за воените злосторства да бидат осудени за своите постапки. „Според доктрината на командна одговорност, хиерархиските претпоставени – вклучувајќи команданти и цивилни водачи, како што се министрите и шефовите на држави – кои знаеле или имале причина да знаат за воените злосторства извршени од нивните сили, но не се обиделе да ги спречат или казнат, треба и кривично да одговараат“, велат од Амнести.