„Силно го поддржувам процесот на создавање единствен пазар на Западен Балкан и очекувам да се зголемува бројот на држави кои ќе учествуваат во отстранувањето на пречките за слободен проток на луѓе, услуги, добра и стоки во нашиот регион“, порача денес поранешниот премиер Зоран Заев од конференцијата Сараево бизнис форум која се одржува во главниот град на Босна и Херцеговина.
Говорејќи на панелот за заздравување на економијата по ковид пандемијата, Заев дека Западен Балкан има огромни потенцијали и затоа треба да игра, како што рече, поголеми игри во економијата.
„Време е регионот да си го „спакуваме“ и како инвестициски потенцијал. За да ги донесеме големите играчи треба и ние да играме поголема игра. Западен Балкан има огромни потенцијали за создавање енергија од обновливи извори, имаме многу сонце, ветер и вода. Тоа подразбира инвестиции во големи стратешки и инфраструктурни проекти, а денес тоа го можат големи и глобални инвеститори. Нашите држави може да се конкурентни за вакви проекти само ако се здружиме и ако настапуваме како регион“, истакна тој.
„Погледнете го проектот Александруполи, типичен пример како треба да се игра регионално кога е во прашање глобалната енергетска политика. Имено, пред неколку дена во Александруполи, Грција, започна изградбата на терминалот за течен гас, проект за долгорочна енергетска независност и за стабилно и постојано снабдување со течен гас во едно исклучително кризно време“, посочи Заев и додаде дека регионот треба да биде уште похрабар и одлучен кога станува збор за регионалното поврзување. „Ситуацијата во Украина ја налага таа нужност и ги зголемува потенцијалите за регионална соработка на Западен Балкан“, смета Заев.
Поранешниот премиер и поранешен лидер на СДСМ изрази и загриженост од намалените проекции за економски раст на глобалната и европската економија.
„Светска банка во својот априлски извештај за Европа и Централна Азија наведе дека стапката на раст во Западен Балкан ќе падне на 3,2 отсто во 2022 година. Тоа е намалување за 0,9 процентни поени во однос на јануарската проекција кога беше прогнозиран раст од 4,1 процент“, рече Заев.
„Денес предизвиците се многу поголеми – недостаток на храна, глобална реорганизација на снабдувањето со енергенси, ценовни шокови. Мораме да соработуваме, за да успееме. Клучот е во партнерствата, во сојузништвата. Во услови на ризици од глобален немир, мораме да се здружуваме и да создаваме платформи, соработки и партнерства кои емитуваат регионален мир, стабилност, предвидливост“, порача тој.
Затоа, додаде Заев, регионалната соработка ја ставам на првото место.
Во својот говор тој се осврна и на војната во Украина како дополнителен катализатор на економската криза по пандемијата, и рече дека државите мора засилено да им помагаат на своите граѓани. „Затоа, апелирам до владите, не штедете на граѓаните, напротив вложувајте во нив – во куповната моќ и во развојот на човечкиот капитал“, истакна поранешниот премиер.
„Уверен сум дека економиите на Западен Балкан ќе бидат и посилни и подинамични доколку се соработуваат, доколку се здружуваат и доколку се стремат што поскоро да прераснат во една единствена отворена економија на Западен Балкан. Тоа е гаранција за конкурентност во однос на целиот свет, гаранција за инвестиции, за работни места, за потрошувачка моќ и конечно, гаранција за подобар живот на нашите граѓани“, рече тој во обраќањето.
Сараево бизнис форум е најголема конференција за бизнис и инвестиции во Југоисточна Европа, која се одржува во Сараево секоја година почнувајќи од 2010 година. Конференцијата се одржува денеска и утре. Оваа година како говорници на конференцијата се најавени и словенечкиот претседател Борут Пахор и поранешниот претседател на Хрватска, Стипе Месиќ.