Лично сметам дека намалувањето на бројот на изборните единици со непостоечки или минимален изборниот праг, како и отворените листи, имаат потенцијал да ја збогатат парламентарната дебата и да придонесат за намалување на поделбите меѓу граѓаните, рече претседателот Пендаровски во денешната дебата за изборните реформи што се одржува во организација на Институтот за европска политика – Скопје.
Пендаровски рече и дека верува дека отворените листи ќе придонесат за зголемување на демократската политичка култура и поголем ангажман на граѓаните во политичкиот процес и ги повика, како што рече, оние кои во иднина ќе одлучуваат за промени во изборниот модел при разгледувањето на можните опции да се водат од јавниот интерес и подобрата иднина за сите наши граѓани. „Затоа што во зрелите демократии, никој не е вечно на власт“, рече тој.
Пендаровски аргументираше дека првите повеќепартиски избори во 1990 биле според мнозински модел и дека „пратениците од тој парламентарен состав успеаја во огромно мнозинство да се обединат околу стратешките државни интереси, како што беа референдумот за македонската независност, првиот Устав на независна држава, системските закони, монетарното осамостојување и евроатлантска ориентација на државата“.
„За жал, низ годините и со модификацијата на изборните модели, од мнозински, прво преку комбиниран в0 1998 година, па се до чисто пропорционален со шест изборни единици од 2002-та, се намалуваше плуралноста и според бројките и според содржината, да бидеме реални. Помалите партии или се претопуваа во две-три големи предизборни коалиции или, заедно со независните кандидати исчезнуваа од македонската политичка сцена бидејќи не можеа да го достигнат ниту т.н. природен изборен праг. Прашање кое бара сериозна политичка анализа е дали поголемата плуралност во раните 1990-ти значеше и помала политичка поларизација меѓу политичките субјекти и помеѓу граѓаните, и обратно, но, првичниот впечаток е токму таков“, посочи шефот на државата.
„Уште на почетокот на мојот мандат ја поддржав иницијативата на неколку политички субјекти за реформа на актуелниот изборен модел. Генерално, мојата поддршка беше за создавање на пропорционален изборен модел со отворени листи, како и намалување на бројот на изборни единици на целата територија на државата. Според мене, едно исклучително важно прашање за натамошната демократизација на земјата – отворените листи на кандидати за пратеници, во сите досегашни дебати на оваа тема се неправедно потиснати во втор план во однос на прашањето за бројот на изборните единици“, порача тој. (С.К.)
Видео на следниот линк: https://youtu.be/lE8RgAdF9yo