На денешната редовна понеделничка координација во Собранието треба да се разговара за тоа кога би можела да се одржи пленарната седница за Информацијата за содржината на предлог – преговарачката рамка за пристапните преговори на Северна Македонија со Европска Унија.
Претседателот на Собранието Талат Џафери најави дека денес ќе се знае кога ќе биде закажана седницата на чиј дневен ред би бил модифицираниот француски предлог. На координацијата што ќе се одржи во текот на денов, се очекува да присуствува и вицепремиерот за евроинтеграции, Бојан Маричиќ.
„Во понеделник имаме координација на која ќе присуствува и владиниот претставник и ќе разговараме. Ќе се направи проценка. Материјалот е дојден во Собранието, но во понеделник треба да почне седницата за ребалансот на Буџетот, изјави минатата седмица Џафери.
Тој додаде дека за денеска е закажана пленарната седница за ребалансот на Буџетот, која е согласно роковите и за која дебатата треба да трае најмногу пет дена, но доколку има потреба ќе биде прекината и ќе биде закажана нова седница на која на дневен ред би била Информацијата испратена од Владата. Џафери, како одговор на реакцијата на опозицијата дека до Собранието не се пристигнати клучните документи од францускиот предлог, вели дека сите документи се веќе јавно достапни и секој може да ги види.
Во политичките кругови постои разногласие околу тоа чиј треба да биде главниот збор околу жешкото прашање. Од СДСМ сметаат дека Собранието треба да донесе заклучоци, а од ВМРО-ДПМНЕ бараат владиниот пакет за францускиот предлог да биде вратен во Владата бидејќи е празен. (Р.Н.)