Министерот за внатрешни работи Оливер Спасовски утрово упати апел денешниот протест да биде мирен.
„Дијалогот продолжува на 80. седница на Собранието на којашто треба да се обрати претседателката на Европската комисија, Урсула фон дер Лајен, а на која ќе се расправа за Информацијата за содржината на Предлог-преговарачката рамка за пристапните преговори на Република Северна Македонија со Европската Унија, предложена од страна на Претседателството на Франција на 30 јуни 2022 година“, порача тој.
„Иако ниту вчерашниот, ниту протестите во изминативе неколку дена не беа уредно пријавени, наспроти неодговорноста на организаторите, повикувам на свесност и одговорност во постапките“, вели министерот.
„Никогаш поважни и порешавачки не биле европските вредности и социо-културни манири од сега – моментум кога демократските процеси мора да течат непречено.
Почитувани граѓани, Македонци, Албанци, Срби, Турци, Роми, Власи, сите граѓани на Република Северна Македонија, ве уверувам, македонската полиција останува на нивото на својата задача во заштитата на уставно загарантираното право на протест на граѓаните и, секако, на безбедноста на институциите и граѓани“, додаде Спасовски. (Р.Н.)