Ивана Трамп, првата сопруга на поранешниот претседател Доналд Трамп, со која имаше три деца, почина вчера на 73-годишна возраст. Таа беше најдена на дното од внатрешните скали во нејзината куќа, откако според првите претпоставки, паднала и се стркалала по нив. Според првите проценки, таа или доживеала срцев удар по што се струполила низ скалите, или некоја друга медицинска причина го предизвикала падот. Обдукцијата треба да ги покаже точните причини за нејзината ненадејна смрт.
Родена во 1949 година во поранешна Чехословачка како Ивана Зелничкова, таа како млада девојка се сели во Австрија за да избега од комунистичкиот режим. Во Австрија се мажи за инструктор по скијање, од кого се развела веднаш штом добила австриско државјанство. Тоа и овозможува да се пресели во Канада каде извесно време работела како инструкторка по скијање и како модел. Оттаму заминува за САД, каде работи само како модел.
Ивана го запознала Доналд Трамп во 1976 година, а се венчале во април следната година. Со него имала три деца – Доналд Џуниор, Иванка и Ерик.
Во текот на осумдесеттите и деведесеттите, Доналд и Ивана како дел од јавната сцена во Њујорк привлекоа големо медиумско и јавно внимание.
Ивана активно учествуваше во неколку деловни потфати на Доналд Трамп. Таа беше извршен директор во замокот Трамп, еден од неговите хотели и казина во Атлантик Сити. Раководеше и со дизајнот на „Гранд Хајат хотел“ кој некогаш го држеше Доналд и „Трамп Тауер“.
Веста за нивниот развод во 1992 година беше централна тема на американскиот печат, а причината за разводот наводно била афера која Трамп ја имал со неговата идна сопруга Марла Мејплс. Ивана го иницираше разводот, а многумина се сеќаваат на нејзината реченица „Не се лути, земи му сѐ!“. Доналд и плати 25 милиони долари.
По разводот, Ивана се сврте кон модата и лансираше сопствен бренд на козметика, облека и накит.
Кога Доналд Трамп беше избран за претседател на САД, таа рече дека може да „направи големи промени“ во САД и изјави дека го советувала за време на неговата изборна кампања.
„Разговаравме пред и по јавни настапи и тој ќе ме прашаше што мислам“, рече тогаш таа и додаде дека го советувала да биде помирен. Ивана тврдеше дека разговарала барем еднаш неделно со Трамп додека тој беше претседател на САД. „Но не одев во Белата Куќа бидејќи таа (Меланија, н.з.) е таму. Јас сум прва дама а не таа“, често изјавуваше Ивана Трамп.
Нејзината ќерка Иванка и зетот беа клучните личности во тимот на Трамп додека беше претседател.
Ивана има напишано неколку книги, вклучително и „Raising Trump“ во 2017 година за нејзините деца и нивното воспитување со Доналд.
„Колку и да бев зафатена, појадував со моите деца секој ден. Седев со нив на вечера секоја вечер и им помагав со домашните задачи пред да излезам во фустан на Версаче на некој хуманитарен настан“, го опишала својот живот во своите мемоари Raising Trump.
Ивана Трамп продолжи со својот бизнис во претходните години, промовирајќи ја италијанската исхрана во 2018 година.
Нејзиното богатство се проценува на 100 милиони долари.
Се мажеше уште двапати. Двајцата сопрузи и беа Италијани. Едниот со кого остана подолго, почина од рак. Со другиот се разведе по една година.
Последната година Ивана можеле да се забележи како шета рака под рака со нејзината помошничка низ Менхетен каде што се наоѓаше нејзината раскошна куќа.
Вчера, Ивана имала закажано термин кај нејзиниот фризер. Тој се зачудил кога некој во нејзино име се јавил да го откаже. Таа била многу среќна во изминатиот месец, затоа што денес требало да замине на летен одмор во Сен Тропез, кој и бил прво излегување од САД по пандемијата. Планирала таму да остане до септември.
Нејзиниот син Ерик и снаата, вчера поитаа во нејзиниот дом. На излегување тој им рече на новинарите кои чекаа пред домот на Ивана: „Тажен, тажен ден господа“.
Веста за смртта на Ивана Трамп прв ја соопшти Доналд Трамп на неговата мрежа Truth social network. (Од новинските агенции)