Во Албанија денеска даде заклетва новиот претседател Бајрам Бегај. Тој ќе биде осмиот претседател на државата.
Бегај беше избран за претседател на 4 јуни годинава, со 78 гласови на пратениците на Собранието во третиот круг, откако владеачката Социјалистичка партија и опозициската Демократска партија не се договорија за избор на консензуална личност за претседател.
Демократската партија не гласаше за Бегај и го нарече неговото назначување неуставно. Бегај, кој по професија е лекар, доаѓа како претседател од позицијата началник на Генералштабот на албанските вооружени сили.
Тој ја презеде функцијата од Илир Мета, чие претседателство се карактеризираше со судири со владата на Еди Рама и правни битки во Уставниот суд.
Позицијата на претседателот во Албанија е главно церемонијална, но има надлежности во утврдувањето на генералниот правец на надворешната политика и безбедноста.