Американскиот претседател Џо Бајден има намера да се кандидира за реизбор во 2024 година, иако анкетите покажуваат дека 75 отсто од поддржувачите на Демократската партија не го сакаат за свој кандидат. Ова јасно го истакна портпаролката на Белата куќа, Карин Жан-Пјер, за време на брифингот со новинарите.
Од неа беше побарано да коментира за анкетата нарачана од Си-Ен-Ен, објавена вчера, според која само 25 отсто од демократските гласачи ја поддржуваат номинацијата на Бајден во 2024 година. „Не сме загрижени за изборите. Претседателот јасно стави до знаење дека има намера да се кандидира, но е толку далеку што е рано да се размислува“, одговори Жан-Пјер.
Пред една недела, истражувачката канцеларија на Универзитетот Квинипиак објави дека 54 отсто од поддржувачите на Демократската партија се против учеството на Бајден во претседателската трка во 2024 година. Падот на поддршката за шефот на државата во неговата партија доаѓа во време на пад на неговата популарност во земјата. Минатата недела тој процент падна на 36 отсто, што е најниско ниво во последните 19 месеци откако Бајден влезе во Белата куќа. Една од причините за ова се зголемените трошоци за живот во САД. Во јуни, инфлацијата достигна највисоко ниво во последните 40 години од 9,1 отсто на годишна основа.