„Се трудам лично да посетувам даночни обврзници, изворно од нив да слушнам со кои проблеми се соочуваат. Токму од ваквите посети, некои од забелешките кои кои биле спроведливи, веќе се имплементирани. Сметам дека од заеднички интерес е да се градат партнерски односи со даночните обврзници“, рече директорката на УЈП, Сања Лукаревска во интервју за „24 инфо“.
Таа додаде дека преку транспарентен пристап се унапредува процесот на меѓусебна комуникација како и дека се подига даночната свест и морал.
„Би рекла дека согласно податоците од наплатата на приходите, досега компаниите редовно си ги сервисираат даночните обврски. Оваа година наплатата по сите видови приходи заклучно со септември изнесува 77,2 милијарди денари, што е за 0,62% повисока во однос на планот за 2022 за овој период и за 19,80% во однос на истиот период минатата година. Предизвик и огромна одговорност е во време на глобална криза да се зачува животниот стандард на граѓаните и ликвидноста на компаниите“, рече Лукаревска.
Директорката на УЈП кажа дека износот на поврат на ДДВ оваа година, од јануари до септември, е 32,8 милијарди денари, што е за 49,86 отсто повеќе од минатата година. Како што објасни Лукаревска, со повратот на ДДВ во рок од 30 дена се обезбедуваат ликвидни средства за компаниите.
„Средства за МојДДВ имало и ќе има. Во моментов, со антикризните мерки обезбедени се дополнителни 18 милиони евра во Буџетот за поврат на средства, за граѓаните корисници на Мој ДДВ. Во ноември следи исплатата на третото тромесечје за скенирани фискални сметки преку МојДДВ во месеците јули, август и септември, каде што согласно пресметките, се очекува за трето томесечје од 2022 година, на граѓаните да им се вратат околу 580 милиони денари“, подвлече директорката на УЈП.
Таа додаде дека мерката станува се поактивна и дека бројот на корисници секојдневно расте. Во моментов апликацијата ја користат над 460 илјади корисници во земјава.
„За три години како се реализра мерката МојДДВ, УЈП, на сметките на корисниците исплати 4,2 милијарди денари или близу 68,3 милиони евра. Тоа се сериозни средства преку кои директно се подобруваат семејните буџети, а на овој начин позитивно влијаевме и врз стеснување на обрачот на сивата економија“, вели Лукаревска.
Лукаревска истакна дека се обезбедени храна, струја и енергенси во пресрет на зимата. „Обезбедивме доволно храна, струја и енергенси во пресрет на зимата. Следува тежок период но подготвени сме за сите предизвици“ изјави Лукаревска во интервјуто.
Таа додаде дека СДСМ е посветена на успешно менаџирање со последиците од глобалната економска и енергетска криза, заштита на стандардот на граѓаните и помош за тие на кои им е најпотребна.
„После 17 години започнавме преговори со ЕУ, со заштитен македонски идентитет, како резултат на државничките политики токму на СДСМ. Сега е клучно да се заокружат сите процеси и да станеме полноправна членка на ЕУ“, рече Лукаревска.